2019 - 2020 శ్రీ వికారి నామ సంవత్సర ధనుర్రాశి రాశీ ఫలాలు

ధనుర్ రాశి వారికి శ్రీ వికారి నామ సంవత్సరం (ది.06-ఏప్రిల్-2019 నుండి ది.24-మార్చి-2020 వరకూ) కూడా ఏలినాటి శని ప్రభావం ఉన్నది. శ్రీ వికారి నామ సంవత్సరం ధనుర్ రాశి వారికి ఆర్ధికంగా మిశ్రమ ఫలితాలను ఏర్పరచును. వైవాహిక జీవనంలో తీవ్ర సమస్యలను, వివాహ సంబంధాలు కుదురుటలో ఇబ్బందులను ఏర్పరచును. అయితే ఒకసారి వివాహ నష్టం జరిగి ద్వితీయ వివాహం కోసం ప్రయత్నాలు చేస్తున్నవారికి మాత్రం చక్కటి ఫలితాలను ఏర్పరచును.

🪐 గురు గ్రహ ఫలితాలు (Jupiter Influence):

ధనుర్ రాశి వారికి శ్రీ వికారి నామ సంవత్సరంలో గురు గ్రహం వలన 03-నవంబెర్ - 2019 వరకూ వ్యవహరపు చిక్కులు అధికంగా ఏర్పడుచుండును. ముఖ్యమైన పనులు ఆటంకాలు ఎదురగుట వలన ముందుకు సాగక తీవ్ర ఇబ్బందులను కలుగచేయును. 04-నవంబెర్-2019 నుండి గురువు ఆర్ధికంగా అఖండమైన యోగాన్ని ఏర్పరచును. వ్యక్తిగత జీవనంలో మాత్రం నైతిక విలువలు తప్పుట వలన పతనమగునట్లు చేయును. ద్వితీయ వివాహ ప్రయత్నాలు చేయువారికి సహాయపడును.

🪐 శని గ్రహ ఫలితాలు (Saturn Influence):

ధనుర్ రాశి వారికి శ్రీ వికారి నామ సంవత్సరంలో శని గ్రహం వలన సంవత్సరం అంతా శారీరక శ్రమ అధికం అగును. కోరుకొన్న విధంగా శరీర సౌఖ్యం ఉండదు. మధ్య మధ్యలో చిన్న చిన్న ఆరోగ్య సమస్యలను కూడా ఏర్పరస్తూ ఇబ్బందులు కలుగ చేయును. ఆర్ధికంగా మాత్రం శని ఈ సంవత్సరం ధనుర్ రాశి వారికి పెద్దగా ఇబ్బందులను కలుగచేయడు. సంవత్సరాంతానికి కొద్దిపాటి సంపాదించిన ధనం నిలువచేసుకోను పరిస్థితులను ఏర్పరచును. వ్యక్తిగత జీవనంలో జీవిత భాగస్వామికి ఆరోగ్య సమస్యలు కలుగచేయును.

🪐 రాహు - కేతు గ్రహ ఫలితాలు (Rahu & Ketu Influence):

ధనుర్ రాశి వారికి శ్రీ వికారి నామ సంవత్సరంలో రాహు - కేతువులు ఇరువురూ కలసి రారు. వైవాహిక జీవనంలో తగాదాలను, కళత్ర నష్టములను, జారత్వం వలన (అక్రమ సంబంధాలు) తీవ్ర సమస్యలను కలుగచేయును. అనవసర పట్టుదలకు పోవుట వలన వ్యక్తిగత నష్టములను, శరీర సౌఖ్య లేమిని కలుగచేయును.